Nagsalita na ang kampo ni Arjo Atayde sa isyung paglabag umano ng grupo ng aktor sa safety protocols ng Baguio City.
Sa Baguio City isinagawa ang shooting, na tumagal ng halos dalawang buwan, para sa pelikula ni Arjo.
Si Arjo ay anak ng beteranang aktres na si Sylvia Sanchez at negosyanteng si Art Atayde.
Kahapon, August 17, isinapubliko ni Baguio City Mayor Benjamin Magalong ang pag-alis ni Arjo sa nasasakupang siyudad gayong positibo raw ang aktor sa COVID-19.
Ipinaliwanag ng alkalde na hindi umano tumupad si Arjo sa tagubilin niyang huwag umalis ng Baguio habang hinihintay ang resulta ng COVID-19 test ng aktor.
Napag-alaman daw ni Magalong na noong August 16 ay umalis ng Baguio si Arjo.
Ani Magalong: "Positive siya. Kaya lang bigla siya umalis kahapon without our knowledge, claiming na siya lang daw ang asymptomatic.
"At yung mga kasama niya, asymptomatic, iniwanan na lang niya..."
Nag-aalala raw ang alkalde na baka sa ginawa ni Arjo ay posibleng makahawa ito ng ibang tao.
"MUTUAL DECISION" OF PRODUCTION, ARJO'S PARENTS, DOCTORS
Ngayong Miyerkules, August 18, naglabas ng opisyal na pahayag ang pamunuan ng Feelmaking Productions Inc., ang pag-aaring production company ni Arjo.
Nilagdaan ito ng head of production na si Ellen Criste.
Sabi ni Criste, "mutual decision" ng produksiyon, mga magulang ni Arjo, at ng mga doktor ng aktor na dalhin sa ospital sa Manila si Arjo.
Taliwas sa naunang pahayag ni Magalong na iniwan ni Arjo ang mga kasamahan sa Baguio, nilinaw ni Criste na binigyan ng "assistance" ng produksiyon ang siyam pang katao mula sa kanilang grupo na nagpositibo sa COVID-19.
Bahagi ng pahayag ni Criste: "Arjo Atayde tested positive for COVID-19 as shooting for his new film culminated in Baguio last August 16. Arjo was suffering from high fever, headaches, and difficulty in breathing.
"It was the mutual decision of Feelmaking Productions Inc., Arjo's parents, and doctors to rush the actor, who has a pre-existing medical condition, straight to a hospital in Manila on August 17.
"We have provided assistance for nine others who tested positive for COVID-19 but are asymptomatic and are currently in quarantine. We have likewise coordinated with the local officials for the necessary safety protocols."
ON COORDINATING WITH MAYOR MAGALONG
Ayon pa kay Criste, nakipag-ugnayan ang pamilya ni Arjo kay Mayor Magalong tungkol sa isyu.
Tila kaugnay ito ng pahayag ni Magalong na may iba pang paglabag sa safety protocols na ginawa ang grupo ni Arjo.
Diumano, hindi sumunod ang produksiyon sa usapan na bubble o lock-in shooting ang ipatutupad sa paggawa ng pelikula, na kinabibilangan ng may isandaang katao.
Napag-alaman daw ni Magalong na may mga umuuwi sa gitna ng period ng dapat sana'y bubble.
Siniguro naman ni Criste na sumusunod ang produksiyon sa safety protocols ng Baguio City.
Aniya: "The Atayde family has reached out to Mayor Benjamin Magalong and we assure him and the people of Baguio that we will comply with our commitments to the City.
"We are grateful for the opportunity to shoot in their beautiful city and apologize for whatever inconvenience that this unfortunate incident may have caused."
Sa huli, humiling ang kampo ni Arjo na ipagdasal na gumaling na ang aktor.
"We request for prayers for the speedy recovery of Arjo and the nine who tested positive."
