Sina Rabiya Mateo at Jeric Gonzales na nga ba?
Naiintriga ngayon ang netizens matapos ang magkakasunod na pagkalat ng sweet photos at videos ng Miss Universe Philippines 2020 at ng Kapuso actor.
Nagsimula ito nang i-post noong nakaraang linggo ang paparazzi shots ng dalawa na magkayakap.
Nakunan sina Rabiya at Jeric sa isang sikat na amusement park sa Sta. Rosa, Laguna.
Obvious sa kanilang public display of affection na walang balak itago ng dalawa kung anuman ang meron sila.
Bukod dito, nagsunud-sunod din ang sightings nina Rabiya at Jeric sa iba pang okasyon.
Kita ang sweetness nila sa kumalat na videos.
Very telling ito lalo’t ayon sa GMA Artist Center, wala namang proyekto sa ngayon ang dalawa na magkasama.
Ang huling nakarelasyon ni Rabiya ay ang long-time boyfriend nitong si Niel Salvacion.
Naghiwalay ang dalawa noong nakaraang taon, kasunod ng pagsabak ni Rabiya sa Miss Universe 2020 pageant.
For the longest time ay na-link naman si Jeric sa Magkaagaw co-star nitong si Sheryl Cruz, bagamat iginiit ng dalawa sa interviews na wala silang relasyon.
RABIYA MATEO-JERIC GONZALES SIGHTINGS
Sa isang video, nakunan sina Rabiya at Jeric na nakaupo. Inaayos ni Jeric ang kanyang buhok habang masinsinang kausap si Rabiya.
Sa isa pang hiwalay na video, nakunan ang dalawa na nakatayo. Si Rabiya, natiyempuhan pang humawak sa tiyan ni Jeric, habang naghahanda sila kasama ang iba pa para sa isang boodle fight.
Bukod pa sa videos, nag-post din ang ilang netizens ng kani-kanilang mga larawan kasama sina Jeric at Rabiya.
Kahapon, December 26, 2021, nag-post ng pictures ang isang male netizen kasama sina Rabiya at Jeric habang nasa beach.
Base sa lokasyon ng netizen, kuha ang mga ito sa Olongapo City.
Gayundin ang isang female netizen na natiyempuhan sina Jeric at Rabiya sa amusement park sa Laguna noong December 16, 2021.
Nagkatrabaho sina Rabiya at Jeric sa isang episode ng Wish Ko Lang, ang Kapuso weekly drama anthology, noong November 2021.
Mukhang iyon ang nagbukas ng pinto para mapalapit ang dalawa sa isa't isa.
Kaso ba ito ng pagtatrabahong nauwi sa totohanan?
Nakipag-ugnayan ang PEP.ph sa kampo ni Jeric, subalit tumanggi muna silang magbigay ng pahayag sa real score ng aktor at ni Rabiya.
Nakipag-ugnayan din kami sa panig ni Rabiya, pero hindi pa kami nakakatanggap ng sagot.
Kaagad naming ilalathala ang kanilang reaksiyon oras na magpadala sila ng sagot ukol sa tunay na estado ng relasyon nina Rabiya at Jeric.