Kumpirmadong ang South Korean actor na si Kim Ji Soo ang bagong karakter na papasok sa Kapuso primetime series na Black Rider.
Sa inilabas na teaser photo at video ng GMA Public Affairs nitong Biyernes ng gabi, June 28, 2024, opisyal nilang ibinahagi sa publiko ang magiging partisipasyon ng kilalang K-drama actor sa buhay ng mga bidang sina Elias (Ruru Madrid) at Bane (Yassi Pressman).
Mababasa sa caption ng kanilang post (published as is), "KIM JI SOO SA 'BLACK RIDER'
"Ang umaatikabong aksyon, itotodo na sa pagdating ng South Korean actor na si Kim Ji Soo!
"Kilalanin ang kanyang karakter sa primetime action-serye ng masa na #BlackRider!"
Read: Ruru Madrid "starstruck" working with top action stars for Black Rider
Ipinakita na rin si Kim Ji Soo sa episode ng Black Rider ngayong June 28, kunsaan makikita ang patikim ng kanyang karakter sa trailer ng episode na mapapanood sa Lunes, July 1.
Base sa trailer, si Kim Ji Soo ang magsisilbing tagapagsanay ni Bane (Yassi) sa pakikipaglaban at paghawak ng baril.
Read: Ruru Madrid informs Bianca Umali about his kissing scene with Angeli Khang in Black Rider
YASSI GIVES CLUES ON KIM JI SOO'S GUESTING
Bago isapubliko ang partisipasyon ni Kim Ji Soo sa Black Rider ay nakapanayam pa ng GMA News Online si Yassi noong June 27.
Dito ay pahaging siyang nagbigay-impormasyon sa bagong karakter na aabangan sa kanilang serye.
Aniya, "Ang trainer po ni Bane ay napakapamilyar po sa maraming mga Pilipino, lalung-lalo na po sa mga nanonood ng K-drama.
"Very, very exciting po. Ang set po namin, nagkakagulo every time na may mga ganoon po kaming eksena.
"We're very, very excited to see if you guys would love this character."
Si Kim Ji Soo ay kilalang aktor sa South Korea dahil sa mga ginampanan niyang karakter sa pelikula at serye na kinakiligan ng libu-libong Pinoy K-drama fans.
Kabilang sa mga seryeng nagawa niya ay ang Moon Lovers: Scarlet Heart Ryeo (2016), Strong Girl Bong Soon at Bad Guys 2 (2017), at My First First Love (2019).