Nilinaw ng lifestyle vlogger at entrepreneur na si Camille Co na wala siyang anumang kaugnayan sa kapwa content creator na si Claudine Co, 25.
Viral na usap-usapan ngayon sa social media si Claudine matapos mapag-alamang kamag-anak siya nina former Ako Bicol Partylist Representative Christopher Co at incumbent Ako Bicol Partylist Representative Elizaldy "Zaldy" Co.
Si Claudine ay anak ni Christopher Co, ang co-founder ng Hi-Tone Construction and Development Corporation.
Tiyuhin naman niya si Zaldy Co, ang chief executive officer ng Sunwest Group of Companies.
Kapwa kabilang ang dalawang kumpanya sa nangungunang 15 construction companies sa listahang inilabas ni President Ferdinand Marcos Jr. na nakakuha umano ng kontrata mula sa Department of Public Works and Highways (DPWH) para sa mga proyektong flood control, kalsada, tulay, at mga gusali mula 2023 hanggang 2025.
Read: Jessica Soho, pinupuri dahil sa pagtalakay isyu ng flood control projects
Lumalabas sa maanomalyang flood control projects na kinukurakot umano ng ilang construction at development companies ang bilyun-bilyong pondo para sa nasabing proyekto.
Ito ang pinag-ugatan ng pagkuwestiyon sa marangyang pamumuhay na ipinakita ni Claudine sa kanyang Claud’s YouTube channel at Instagram page.
Kabilang na rito ang pagbibiyahe nila ng kanyang pamilya sakay ng private plane, madalas na pagbabakasyon sa iba’t ibang bansa, at pagsusuot ng designer clothes, at paggamit ng branded bags na umaabot sa milyun-milyon ang halaga.
Dahil sa mga ito, inaakusahan ngayon si Claudine at ang kanyang pamilya na nanggaling umano sa taxpayers ang ginagastos sa luho nila, at ipinapanawagang isama siya sa masusing imbestigasyon ng Kamara.
Read: Vico Sotto explains need to call out journalists on Discaya issue
Dala ng kaliwa't kanang batikos at pangunguwestiyon ng netizens, pansamantalang nag-deactivate at private si Claudine sa kanyang mga social media account, na walang ni isang sinagot tungkol sa ipinupukol na alegasyon sa kanyang pamilya.
Read: Claudine Co, binabatikos dahil sa pagbalandra ng lavish lifestyle
CAMILLE CO NOT CLAUDINE CO
Dito na nadawit ang pangalan ni Camille Co.
Dahil hindi na mahagilap ang ibang social media accounts ni Claudine, ilang netizens ang napagkamalan siya at si Camille ay iisa.
Sa X (dating Twitter) nitong Miyerkules, August 27, 2025, nilinaw ni Camille na wala siyang anumang ugnayan kay Claudine at sa negosyo ng pamilya Co.
Mababasa sa tweet niya (published as is): "Imagine my surprise opening my TikTok and discovering a ton of comments because of the viral Co’s. I’m not related to them nor do I know them. Why naman Lordttttttt."
Paglilinaw pa ni Camille, maaaring parehas sila ng apelyido ni Claudine ngunit hindi raw politiko at wala raw construction company ang kinabibilangan niyang pamilya.
Aniya: "Bakit kasi ang daming Co?!? There’s not one famous Co in my fam. They’re all very private. No one is in politics, the government nor construction.
"I’m not an heiress. I’m just a hardworking kween."
Diin pa niya: "One last time for the people in the back: I am Camille. Not Claudine. Spell it with me now: C-A-M-I-L-L-E. Also, Google is free. (Unlike those people’s corruption-funded shopping sprees.)"
Camille CO’s husband IN CONSTRUCTION COMPANY
Binigyang linaw rin ni Camille ang kumukuwestiyon sa trabaho ng kanyang Finnish entrepreneur husband na si Joni Koro.
Napag-alaman kasi ng netizens na nasa construction business din ang kanyang mister, taliwas sa sinasabi ni Camille na walang relasyon sa construction ang kanyang pamilya.
Post ni Camille sa kanyang Instagram Stories: "I feel like I should hold a sign saying, 'Not related to the CO's going viral at the moment.' Nanahimik ako dito.
"In all seriousness, I'm not related to anyone in politics nor construction. (Pati na rin Pure Gold, since we're clarifying things lol)."
Inirepost ito ni Joni, kalakip ang caption niya na may halong biro: "Excuse me, I'm in construction. You are very much related to the shady Pieni Surfaces."
Sinagot naman ito ni Camille.
Aniya, na hinaluan din ng biro: "I stand corrected. My hubs [Joni Kori] is in fact in construction.
"And although his company Pieni Surfaces can do wonderful things for your walls and floors, it cannot contribute anything to flood control. (Although those contractors also didn't contribute anything to flood control so...)"
