Madalas naririnig at umiiral sa maraming Pinoy ang kasabihang "blood is thicker than water."
Ngunit ang kasabihang ito ay taliwas sa nangyayari ngayon sa relasyon ng actress-TV host na si Kim Chiu at nakatatandang kapatid na si Lakam Chiu.
Nitong Martes, December 2, 2025, naghain ng reklamong qualified theft si Kim laban kay Lakam sa Quezon City Prosecutor's Office.
Sa opisyal na pahayag na inilabas ni Kim sa pamamagitan ng Star Magic, ang talent management arm ng ABS-CBN Studios, ibinahagi niya ang rason kung bakit siya humantong sa pagsasampa ng reklamo sa sariling kapatid.
Read: Kim Chiu sues sister Lakam for qualified theft
Dito inamin ni Kim na nadiskubre niya ang "financial discrepancies" sa "business assets" niya na may kinalaman umano ang kapatid.
Bilang kapamilya, masakit daw para sa aktres na humantong sa legal battle ang hidwaan nila ni Lakam.
Bagamat hindi sinabi ni Kim kung magkano ang aniya'y nawawalang halaga sa kanyang kumpanya, nanindigan ang aktres na kailangan niyang gawin ang pagsasampa ng reklamo para protektahan ang kumpanyang pinaghirapan niya pati na rin ang mga empleyadong umaasa rito.
KIM-LAKAM'S FALLOUT
Kalagitnaan ng taong 2025 nang magsimulang maging usap-usapan ang sigalot sa pagitan nina Kim at Lakam.
Ito'y matapos magpakawala ng panaka-nakang cryptic posts si Kim sa Instagram patungkol sa "trust issue."
Dumagdag pa rito ang pag-unfollow ni Kim kay Lakam sa Instagram noong August 4, na naging malaking palaisipan sa kanyang mga tagahanga.
Read: Kim Chiu and sister Lakam unfollow each other on Instagram
Ngunit bago mangyari ang gusot sa pagitan ng magkapatid ay hindi kaila na malapit sila sa isa't isa.
Sa katunayan, sa halos lahat ng events at vlogs sa YouTube ni Kim nitong 2025 ay kasa-kasama niya ang nakatatandang kapatid.
Sa artikulong ito, ating balikan ang ilang masasayang alaala at pagsasama nina Kim at Lakam bago sila humantong sa hindi pagkakaunawaan.
JANUARY 2025: Kim's Cebu event, Feng Shui-CONDO vlog, and Chinese New Year celebration with Lakam
Tila masaya ang pasok ng taong 2025 para sa magkapatid na Kim at Lakam.
Patunay rito ang halos magkakasunod nilang posts sa social media na magkasama.
Sa buwan na ito, present si Lakam para suportahan ang nakababatang kapatid sa halos lahat ng mga ganap nito.
Read: Kim Chiu accompanied by sister Twinkle at QC Prosecutor's Office
January 20, makikita sa Instagram ni Lakam ang pagsama niya sa Cebu para sa isang parade event ni Kim na parte ng Sinulog Festival.
January 24, lumabas naman si Lakam sa YouTube vlog ni Kim noong nagpunta ang aktres sa Binondo, Manila, para bumisita sa shop ng feng shui master na si Johnson Chua.
Ilang araw lamang ang lumipas, muling napanood si Lakam sa YouTube vlog ni Kim noong January 27.
Sa pagkakataong ito ay ibinlog naman ng aktres ang kanyang condo unit sa Cebu.
January 29, muling nagkasama ang magkapatid nang ipagdiwang nila ang Chinese New Year, kasama ang iba pa nilang kapamilya.
APRIL 2025: LAKAM GREETS KIM ON HER 35TH BIRTHDAY
Abril na nang sunod na magpost si Lakam na kasama si Kim.
April 30, ibinahagi niya ang ilang larawan ni Kim sa Instagram, kalakip ang pagbati rito ng maligayang kaarawan.
April 19 nang ipagdiwang ni Kim ang kanyang ika-35 kaarawan.
Sa makabagbag-damdaming caption ni Lakam ay pinasalamatan at binigyang-pugay niya si Kim sa pagiging inspirasyon nito hindi lang sa kanilang pamilya kundi maging sa kanyang mga tagasuporta.
MAY 2025: LAKAM SUPPORTS KIM'S BRAND EVENT AND KIM'S BIRTHDAY VLOG
Sinamahan at sinuportahan din ni Lakam si Kim noong May 11 sa pagbubukas ng isang jewelry brand na si Kim ang ambassador.
May 25, inilabas ni Kim sa YouTube ang kanyang birthday vlog nang magpunta siya sa Dubai kasama ang on-screen partner na si Paulo Avelino at kapatid na si Lakam.
Sa vlog, sinalubong nila ang birthday ni Kim.
Read: Kim Chiu shuts down Kimerald reunion fantasy after fans' relapse
JUNE 2025: Kim and Lakam at Father’s Day Celebration
Huling namataan na magkasama ang magkapatid noong June 16 nang ipagdiwang nila ang Father's Day kasama ang ama nilang si William Chiu.
Matapos nito ay naging mailap na ang dalawa sa social media ng isa't isa.
Wala ring birthday greeting si Kim kay Lakam nang magdiwang ito ng kaarawan noong August.
Bagay na ipinagtataka ng fans ng aktres dahil sa mga nagdaang taon ay wala itong mintis sa pagbati sa kapatid.
Read: Kim Chiu on Sister Lakam's Coma: Pinapapirma na ako...
Samantala, habang isinusulat ang artikulong ito ay wala pang inilalabas na pahayag o reaksiyon si Lakam tungkol sa gusot at reklamong isinampa sa kanya ni Kim.