Ang magkapatid na Charo Santos-Concio at Malou Santos ang mga producer ng Some Kind of Valentine, ang pre-Valentine concert nina Christopher de Leon, Tirso Cruz III, at Edgar Mortiz na dalawang gabi (February 3 at February 4, 2023) itatanghal sa Newport Performing Arts Theater ng Resorts World Manila sa Pasay City.
Ayon sa co-producer ng Some Kind of Valentine na si Flor Santos, idea ni Charo na mag-produce sila ng concert na pangungunahan nina Christopher, Edgar, at Tirso.
Read: Lovi Poe, special guest nina Christopher, Tirso, at Edgar sa two-night pre-Valentine concert
“Ang galing ni Tita Charo. Siya talaga ang nagbuo ng idea. Walang pumasok sa isip niya kundi the three of them.
“Ang gaganda ng list of songs. Bago kami nag-finalize ng mga kanta, in-approve niya. We’re going to give you a show na hindi basta-basta,” sabi ni Flor tungkol sa malaking partisipasyon ni Charo sa pagbuo ng Some Kind of Valentine.
Personal na inasikaso nina Charo at Malou ang lahat ng mga kailangan sa concert ng mga aktor na itinuturing na icons sa Philippine entertainment industry.
Binantayan din nila ang rehearsals nina Christopher, Tirso, Edgar, at ng kanilang special guest na si Lovi Poe kahapon, February 2.
Ngayong Biyernes, February 3, ang kaarawan ni Malou pero magiging abala siya sa Some Kind of Valentine.
Idinagdag ni Flor na si Malou ang pumili kay Lovi para makasama sa concert at sa limampung (50) aktres na pinagpilian, ang anak ni Fernando Poe Jr.ang final choice.
“Nag-isip kami kung sino ang magiging queen nila. Sa list of fifty, number one talaga si Lovi,” aniya.
Bilib na bilib si Flor kay Malou dahil sa kabila ng hectic schedule ni Lovi, nagawa ng dating producer ng Star Cinema na kunin ang serbisyo ng aktres.
Tiniyak naman ni Tirso na magugustuhan ng mga kabataan ang mga kantang inihanda nila nina Christopher at Edgar para sa Some Kind of Valentine.
“Reachable, maiintindihan ng mga bata. Matatandaan siya ng mga bata and you should remember, kahit mga Gen Z ang mga yan, alam nila yung mga music namin,” pahayag ng current chairperson ng Film Development Council of the Philippines (FDCP).
“I will give you one example ng music namin na nag-transcend through the years. I’m sure everybody’s familiar with Earth, Wind & Fire. Panahon namin yan.
"Pero kahit yung mga anak namin o kahit yung mga bata pa sa mga anak namin, pinapatugtog ang music ng Earth, Wind & Fire.
"And not only playing it but they enjoyed listening to these type of music that transcends to any age.
“Tipong forever ang mga yan. Kumbaga, parang mga kanta ni Bobot [Edgar], mga standard.
"Alam ng lahat ng mga tao. They might not know it completely but the melody is written in their hearts and minds.
"Yung mga kanta namin, binigyan namin ng bagong arrangement. Iniba namin nang konti yung areglo."