Sigurado na ang pagsali ng Kapuso actress na si Michelle Dee sa Miss Universe Philippines 2023.
Nagsumite na siya ng kanyang aplikasyon sa 4th floor ng Estancia Mall sa Pasig City ngayong Martes nang hapon, February 14, 2023.
Itinaon ni Michelle sa Araw ng mga Puso ang muling pagsali niya sa Miss Universe Philippines.
Muli, dahil naging kandidata rin siya noong nakaraang taon ng naturang patimpalak-kagandahan.
Si Michelle ang kinatawan ng Makati City sa Miss Universe Philippines 2022 na ginanap sa Mall of Asia Arena noong April 19, 2022.
Siya ang hinirang na Miss Universe Philippines Tourism.
Si Michelle ang naging mahigpit na kalaban ni Celeste Cortesi sa Miss Universe Philippines 2022 crown.
Sa panayam namin sa reigning Miss Universe Philippines, sinabi nitong suportado niya ang muling paglahok ng kanyang mga batchmate.
"I will support them ‘coz I love them. We have such a good relationship so I’m rooting for them," pahayag ni Celeste tungkol sa batchmates niyang muling susubukan ang kapalaran sa Miss Universe Philippines.
Hindi na ikinagulat ng beauty pageant fans ang pagsali ni Michelle sa Miss Universe Philippines dahil nagpahiwatig na siya noon sa pamamagitan ng kanyang social media post na may hashtag na #deepatapos.
Read: Michelle Dee, sasali sa Miss Universe Philippines 2023?
Kinumpirma ni Michelle ang pangarap nitong makuha ang Miss Universe Philippines 2023 crown sa kanyang bagong social media post ngayong hapon.
Caption niya, “If not now, then when?” na favorite quote din ni Filipino-American Miss Universe 2023 R’Bonney Gabriel.
Hindi baguhan si Michelle sa pagsali sa mga beauty pageant dahil siya ang nagwaging Miss World Philippines noong 2019.
Pamilyar na pamilyar si Michelle sa mundo ng beauty contest dahil ang kanyang nanay na si Melanie Marquez ang nanalo na Miss International noong 1979 sa Tokyo, Japan.
Read: Former Pinay Miss International winners: Where are they now?