Nakarating na sa Cannes, France sina Arjo Atayde, Enchong Dee, at ang direktor na si Richard Somes ngayong Miyerkules, May 17, 2023.
Dadalo sila sa gala screening ng pelikulang Topakk na magaganap sa Olympia Theater sa Huwebes, May 18.
Si Somes ang direktor ng Topakk, na may English title na Trigger, isa sa pitong pelikulang itatanghal sa Marché du Film Fantastic Pavilion ng 76th Cannes Film Festival.
Ang Topakk ay tungkol sa isang security guard na inalis sa serbisyo sa militar dahil sa mental condition na PTSD (Post-Traumatic Stress Disorder) at nakalaban ng corrupt police death squad.
Nangako si Somes na ipakikita niya sa buong mundo ang tunay na Pinoy action cinema sa pamamagitan ng Topakkk, kahit hindi madali para sa kanya ang bumiyahe sa France dahil sa pagkakaroon niya ng aerophobia o fear of flying.
Si Arjo ang lead actor ng Topakk, at ito ang unang pelikula niya na ipalalabas sa Cannes Film Festival.
CATTLEYA KILLER
Bida rin si Arjo sa Cattleya Killer, ang retelling ng Sa Aking Mga Kamay, ang 1996 psychological thriller drama film na pinangunahan nina Aga Muhlach at Christopher de Leon.
Six-episode series ito na mapapanood sa Prime Video simula sa June 1, 2023.
Kung security guard na may PTSD ang papel ni Arjo, serial killer naman ang karakter niya sa Cattleya Killer.
Read: Arjo Atayde’s co-stars in Cattleya Killer revealed; GMA-7 actor is joining cast
Limang taon lamang ang edad ni Arjo nang magbida si Aga sa Sa Aking Mga Kamay.
Sa panayam sa kanya, sinabi ng incumbent congressman ng District 1 ng Quezon City na hindi niya hinayaan ang sariling makaramdam ng pressure dahil mahusay na aktor ang unang gumanap sa karakter na kanyang binigyang-buhay sa Cattleya Killer.
Saad ni Arjo, “It’s pure collaboration with Direk [Dan Villegas], my co-actors, colleagues, and a lot of research on my own.
“I’m more of a visual learner so I’ve seen a lot of documentaries, a lot of videos, interviews. With that, I aligned whatever I watched with whatever the personality or character that Cattleya demands.”
Kasama si Christopher de Leon sa cast ng Cattleya Killer. Ginagampanan niya ang role ni Joven dela Rosa, ang imbestigador sa kaso ng serial killer na nag-iiwan ng bulaklak ng cattleya sa bangkay ng mga taksil na babae na kanyang pinapatay. Ito rin ang naging role ng veteran actor sa Sa Aking Mga Kamay, pero ang gaganap bilang Benjie, na anak niya sa Cattleya Killer, ay si Jake Cuenca.
Samantala, co-star ni Arjo sa Cattleya Killer ang kanyang kapatid na si Ria Atayde. Walang partisipasyon si Ria bilang aktres sa Topakk pero isa siya sa mga producer ng pelikulang ipinagmamalaki ni Somes.