Dumistansiya si Senate Minority Leader Aquilino “Koko” Pimentel III sa balitang pagkakaaresto ng ex-wife nitong si dating Bb. Pilipinas-Universe 1998 Jewel May Lobaton.
Ayon sa mga lumabas na ulat, sa Laoag, Ilocos Norte naaresto si Jewel dahil sa kinakaharap nitong kasong may kaugnayan sa paglabag sa Article 315 ng Revised Penal Code o estafa.
Sa mga ulat na lumabas, laging nakadikit ang pangalan ng senador sa dating asawa.
Dahil dito, nanawagan si Senator Pimentel sa lahat ng media practitioners na huwag nang banggitin ang kanyang pangalan sa mga ilalabas na balita ukol kay Jewel.
Matagal na raw kasing napawalang-bisa ang kanilang kasal ng korte.
Wala na rin daw karapatan si Jewel na idagdag pa ang kanyang apelyido sa pangalan nito.
Buong tweet ni Senator Pimentel ngayong Huwebes, October 13, 2022: “Calling on all media practiotioners to desist from mentioning me or the Pimentel name in connection w/ news about the arrest of Jewel Lobaton.
“The marriage has long been dissolved/declared null & void by the court & by the church."
“Meaning, Jewel Lobaton has no right to use the surname Pimentel.”
January 2018 nang ma-grant ang annulment na kasal nina Senator Pimentel at Jewel matapos silang opisyal na maghiwalay noong 2012.
Read: Jewel May Lobaton issues statement about separation from husband Senator Koko Pimentel
Mayroon silang dalawang anak na lalaki.
Sa huling panayam kay Jewel na lumabas sa PEP.ph (Philippine Entertainment Portal) noong December 2020, sinabi nitong nangungulila siya sa mga anak dahil matagal na raw niyang nakikita ang mga ito.
Sabi niya, “I am very inspired for the children that I have. Hindi ko pa rin nakikita.
“But I hope one day, as I do this forward, I would be able to reach them. So, yun.”
Pagkatapos nilang maghiwalay ay pinakasalan ni Senator Pimentel si Kathryna Yu noong October 2018.