Nagbigay ng saloobin ang SexBomb Girls members na sina Aira Bermudez at Sugar Mercado hinggil sa isyung kinasasangkutan ng kaibigan at kagrupo nilang si Izzy Trazona.
Read: SexBomb Dancers: where are they now?
Ito ay hinggil sa pagsasapubliko ni Izzy na hindi niya lubusang tanggap ang sekswalidad ng kanyang binatang anak na si Andrei Trazona a.k.a Sofia, maging ang pagiging drag performer nito.
Sa interview nina Aira at Sugar sa Fast Talk With Boy Abunda noong Martes, September 19, 2023, hiningan sila ng reaksiyon ng host na si Boy Abunda tungkol sa paninindigan ni Izzy na huwag suportahan ang anak dahil taliwas ito sa kanyang paniniwala bilang Kristiyano.
Ayon kay Aira, naiintindihan niya ang pinanggagalingan ni Izzy, na kilala raw niyang relihiyosa. Bilang ina, baka nais lamang ni Izzy na mapabuti ang kanyang anak.
Ngunit hindi rin daw ito sapat na batayan para hindi irespeto ang desisyon ni Andrei sa kanyang sekswalidad.
Saad ni Aira, "Kasi yang si Izzy, kumare ko yan, mahal ko yan.
"Meron siyang pinaninindigan at pinaniniwalaan. Yung faith niya kay God, kailangan nating irespeto yun.
"At yung gustong mangyari ng anak niya, kailangan din nating irespeto.
"Kasi ayun naman yung laging itinuturo sa atin."
Read: Andrei Trazona gets overwhelming support from father Michael Navarro
Isang bagay lang daw ang nakikitang mali ni Aira sa bangayan ng mag-inang Izzy at Andrei. Ito ay ang pagsasapubliko nila sa problema ng kanilang pamilya sa social media, imbes na ayusin ito in private.
Pahayag ni Aira, “Pero sana yun lang, pagdating sa problema ng pamilya, yung sinasabi natin lagi, when it comes to social media, 'Think hard before you click.’
"Kasi yung personal na buhay natin, hindi naman nila gustong malaman yun.
"Sana na lang, nag-usap sila, hindi sa social media."
"NAIINTINDIHAN KO RIN PO SI ATE IZZY."
Katulad ng sentimyento ni Aira, naiintindihan din daw ni Sugar kung ano ang pinanggagalingan ni Izzy.
Aniya, bilang ina ay nakaka-relate siya kay Izzy dahil nakatitiyak siyang gusto lamang nitong mapabuti ang anak na si Andrei.
Naniniwala at agree rin si Sugar na kung pinag-usapan na lang sana nina Izzy at Andrei ang kanilang problema at hindi na ipinost pa sa social media, hindi na ito lalaki pa.
Sabi ni Sugar, “Ire-relate ko rin po sa pagiging nanay ko kasi kahit sino naman po sa atin, kahit sinong mahal natin sa buhay at lalo na’t anak mo, nandiyan po yung iingatan mo, gusto mong maging maganda yung buhay niya.
“Naiintindihan ko rin po si Ate Izzy.
"Ang pinaglalaban naman po niya dito yung Panginoon na, wala nang kahit na sino, kaya hindi ko rin po siya masisisi."
Dagdag pa niya, "Pero agree rin po ako kay Ate Aira na sana nag-usap na lang po sila."
Read: SexBomb Izzy Trazona, "amazingly at peace" sa kabila ng mga batikos
Noong September 11, 2023, ini-upload ni Izzy sa Facebook ang kanyang open letter para kay Andrei.
Nakasaad sa kanyang liham na miss na niya ang anak at mahal na mahal niya ito, subalit hindi raw niya tanggap ang kasarian nito bilang miyembro ng LGBTQ+ community dahil labag ito sa kanyang paniniwala.
Ang nais lamang daw niya ay para sa kapakanan ng anak na naaayon sa nasusulat sa Bibliya.
Maraming netizens ang hindi sumang-ayon at bumatikos sa pahayag niyang ito.
Marami sa mga ito ang hindi makapaniwalang hindi tanggap ni Izzy ang gender preference ng sarili nitong anak.