Mariing pinabulaanan ng Star Magic artist na si Amanda Zamora na may katotohanan ang kumakalat na espekulasyon tungkol sa kanila ng Kapamilya A-lister na si Daniel Padilla.
Ilang araw nang usap-usapan online si Amanda nang maiugnay ang kanyang pangalan sa diumano’y bagong nobya ni Daniel.
Nagsimula ito nang minsang pag-usapan sa isang vlog sa YouTube ang kasalukuyang estado ng puso ni Daniel, ilang buwan matapos ang kontrobersiyal na hiwalayan nila ni Kathryn Bernardo.
Dito nabanggit ang pangalang “Amanda” na siya raw bagong nobya ng Kapamilya actor.
Dahil dito, ilang netizens ang naghinalang ang “Amanda” na tinutukoy sa vlog ay ang anak ni San Juan City Mayor Francis Zamora na si Amanda Zamora.
Read: Lucena Mayor Mark Alcala, nanliligaw rin kay Kathryn Bernardo
Mas tumindi pa ang hinala ng netizens nang may ilang litrato ang kumalat na diumano’y naispatang magkasama sina Daniel at Amanda sa isang mall.
AMANDA ZAMORA DISMISSES DATING RUMORS WITH DANIEL
Mariin itong itinanggi ng dating Pinoy Big Brother (PBB) housemate na si Amanda.
Noong Martes, July 30, 2024, nag-post si Amanda sa kanyang Instagram Story para makiusap na tigilan na ang pagpapakalat ng maling balita at espekulasyon tungkol sa kanila ni Daniel.
Mensahe ni Amanda: “I kindly ask everyone to stop spreading baseless rumors and fake news where I am in no way associated with.
“May we be kinder in words towards one another and practice discernment, especially on the internet. Thank you.”
Francis Zamora reacts to daughter being linked to Daniel
Isang araw matapos mag-post sa Instagram ni Amanda ay nagsalita na rin ang kanyang ama na si San Juan Mayor Francis Zamora para ipagtanggol ang anak.
Nakausap ng ilang entertainment press, kabilang ang PEP.ph (Philippine Entertainment Portal), ang alkalde sa launching ng Charm by Dr. Joel Lopez, MD, isang beauty clinic sa Greenhills Mall, nitong Martes, July 31.
Dito niya sinabing walang katotohanan ang bali-balitang may espesyal na ugnayan ang kanyang anak at si Daniel.
Saad ni Zamora, “So, bilang isang ama, gusto ko sabihin sa inyo lahat na hindi po totoo yan.”
Bagamat isa nang showbiz personality ngayon si Amanda, matapos niyang pumasok bilang housemate sa PBB: Connect noong 2021, hindi raw hahayaan ni Zamora na maiugnay sa maling haka-haka ang kanyang anak.
Read: Rommel Padilla hopes Daniel and Kathryn will reconcile
Kinunan din ng reaksiyon si Zamora sa umano’y lumabas na photos na magkasamang naglalakad sina Daniel at Amanda.
Pagtanggi ng alkalde, “Definitely hindi ko po anak yun, kung sakaling may mga viral photos."
Sumang-ayon din si Zamora sa posibilidad na maaaring edited ang tinutukoy na photos para lamang mapalabas na konektado sina Amanda at Daniel.
“Oh, yes. Si Amanda has been single all her life so hindi po totoo yan," paniniyak ng mayor.
"In fact, I'm surprised as a father. At her age, single pa rin siya kasi ano, e, very independent-minded and marami siyang gusto gawin sa buhay.
“So, kung maaalala ninyo, ang one and only major exposure naman niya sa showbiz really then was Pinoy Big Brother.
"Tapos, after that, nagkaroon siya ng movie, yung Connected under Star Magic.
“So, after that medyo, naglay-low na rin siya.”
Read: San Juan City Mayor Francis Zamora excited na mapanood ang anak sa PBB: Connect
Nagbigay rin ng update si Zamora tungkol sa anak.
Wala raw sa Pilipinas si Amanda kaya imposible na ito ang babaeng nakunan ng litrato kasama si Daniel.
Aniya, “She's 23 years old. She's now focused on her studies kasi siya po ay, in fact, nasa Amerika po ngayon.”
Sa darating na September ay sisimulan na raw ni Amanda ang kanyang Master’s degree in Marketing sa isang U.S. university.
Read: Pamilya ni Sandro Muhlach, dumulog na sa ahensiya ng pamahalaan
MAYOR ZAMORA’S CONNECTION WITH DANIEL AND FAMILY
Sa nasabing interbyu, naibunyag din ni Zamora na matalik na kaibigan niya si Daniel at ang pamilya nito.
“For many years, we've been together. In fact, last month, tayo rin po nagkasal kay JC, yung anak ni Karla, so matagal na kami magkakaibigan.
“At si Daniel po ay kaibigan natin matalik,” lahad ng San Juan mayor.
Read: Karla Estrada hopes son Daniel Padilla will be okay
Business partners din sina Zamora at Daniel sa isang bar sa Greenhills, ang District 8, kung saan kasosyo rin nila sina Vice Ganda, James Yap, at iba pa.
Dahil sa ugnayan ng kanilang pamilya, ito raw ang nakikitang rason ni Zamora kung bakit ang anak niyang si Amanda ang naisip agad ng netizens na bagong nobya ni Daniel.
Kung tutuusin, magkaibigan din daw kasi si Amanda at ang nakababatang kapatid ni Daniel na si Magui Ford.
Saad niya, “Ang mag-friends talaga, ako at si Daniel.
“Amanda has always been just a fan [ni Daniel] nung bata pa siya.”
Read: Francis Zamora reacts to daughter being linked to Daniel Padilla
Sundot ng PEP, hindi ba kinausap ni Zamora si Daniel ukol dito lalo na't nadadawit ang kanyang anak?
Sagot ng mayor. “Hindi naman.
"Actually, kasi alam niyo, kung alam naman nating hindi totoo, hindi na para pagtuunan pa ng pansin.
"Kasi alam naman namin talaga hindi totoo."
Dagdag na tanong pa sa kanya, kung hindi ba niya nakikita ang posibilidad na magkaroon ng ugnayan sina Amanda at Daniel, lalo pa't parehong single ang mga ito?
“Actually, hindi ko nakikita mangyayari yan,” mabilis na sagot ng alkalde.
“Hindi ko naman nakikita mangyayari yan kasi baka merong ibang mga focus din naman si Daniel ngayon.
“Mayroon na siyang bagong business at hindi ko naman din siya tinatanong tungkol sa lovelife niya.”
Additional texts by Arniel C. Serato