Tatlong araw lamang nanatili ang magkasintahang Jerald Napoles at Kim Molina sa Seoul, South Korea, para sa shooting ng pelikulang Seoulmeyt.
Bumalik sila sa Pilipinas noong Marso 12, 2024.
Noong Huwebes, Marso 14, dumalo si Jerald sa media conference ng isa pa niyang pelikula, ang Pagpag 24/7.
Ang Pagpag 24/7 ay horror-comedy movie na pinangungunahan nila nina Wilbert Ross, Danita Paner, Nikko Natividad, at Nicco Manalo.
Read: Wilbert Ross at Nikko Natividad, nagbigay ng opinyon sa hipuan issue ni Apo Whang-od
Espesyal para kay Jerald ang Pagpag 24/7 dahil nagkaroon siya ng pagkakataong makasama sa pelikula si Nicco, na isa sa pinakamatagal at matalik niyang kaibigan.
“I am acting with Nicco Manalo, which is my best friend, one of my closest friends.
“Matagal na kaming magkasama, sa teatro pa lang. Hindi pa kami pareho na umaarte sa pelikula, magkasama na kami.
“Nagkasama kami dati sa The Janitor [2014], pero wala kaming eksena ni Nicco.
"Ang nangyari, sa Pagpag 24/7 ang pinakamahaba naming eksena sa matagal naming pagkakaibigan,” sabi ni Jerald tungkol sa pelikulang ginawa nila ni Nicco.
Mapapanood ang Pagpag 24/7 sa mga sinehan simula sa Marso 20, 2024.
REUNION PROJECT
Sa presscon ng Pagpag 24/7, sinabi ni Jerald na reunion project nila ni Kim at ng direktor na si Darryl Yap ang Seoulmeyt.
Unang nakatrabaho ng dalawa si Darryl sa Jowable (2019) at sa Ang Babaeng Walang Pakiramdam (2021).
Jerald Napoles, Darryl Yap, and Kim Molina
Kuwento ni Jerald, “Okay naman ang shooting namin ng Seoulmeyt at nag-shoot kami nang malamig sa Seoul. The coldest was -4 degrees pero may times na -6 to -7 degrees.
“As usual, masaya na kasama ang team ni Direk Darryl. Na-miss namin na maka-work ang isa’t isa.
“Ang maganda sa shoot namin, may tie-up sa Filmline Productions which produced Goblin. So ang mga location namin, mga tourist spot sa Seoul,” pahayag ni Jerald sa eksklusibong panayam sa kanya ng Cabinet Files.
Ang kanyang tinutukoy na Goblin ay ang 2016 South Korean television series na pinagbidahan ng popular Korean actor na si Gong Yoo.
May kinalaman ang Seoul sa kuwento ng bagong pelikula nina Jerald at Kim.
Co-star nila sa Seoulmeyt ang Korean actor na si Ha Ju-yong.
Kim and Jerald with Korean actor Ha Ju-yon (center)