GORGY RULA
Sa may natitira pang hawak na season pass ng Metro Manila Film Festival (MMFF), puwede pa itong gamitin hanggang sa January 13, 2023, Friday the 13th.
Pero iilan na lang ba sa entries ng 48th MMFF ang naiwan sa mga sinehan?
So far, ang nakikita naming nasa sinehan pa ay ang Deleter, Partners in Crime, at Family Matters.
Meron pa sa ilang malls na may tig-isang sinehan ng My Teacher at Labyu With an Accent. Pero ang tatlong topgrossers lang ang madami-dami pang sinehan.
Hindi pa namin alam kung kailan maglalabas ng official total gross ng walong pelikulang kalahok. Pero base sa aming pagtatanong sa ilang reliable source, mahigit P500M na raw ang kinita ng walong pelikulang kalahok hanggang sa huling araw ng filmfest.
Narito ang UNOFFICIAL figures na nakalap ng PEP Troika sa walong entries ng 48th Metro Manila Film Festival:
Deleter — P234M
Partners in Crime — P168M
Family Matters — P56M
Labyu With an Accent — P19M
My Teacher — P12M
Nanahimik ang Gabi — P7M
Mamasapano: Now It Can Be Told — P5M
My Father, Myself — P1.5M
May ilang MMFF movies ay may imbitasyon na ng screening sa ibang bansa. Kagaya ng Nanahimik ang Gabi na meron nang naka-schedule sa Los Angeles, San Francisco, at ilang bahagi ng Europe.
JERRY OLEA
Best Picture ng MMFF 2022 ang topgrosser na Deleter, na nagpanalo rin kay Nadine Lustre bilang Best Actress.
Ang Second Best Picture at winner ng FPJ Memorial Award na Mamasapano: Now It Can Be Told ay second to the last sa takilya.
Iyong R-18 na My Father, Myself ay hindi naipalabas sa SM cinemas.
Take note na iyong Partners In Crime at Labyu With An Accent ay parehong bokya sa awards, at iyong Family Matters ay isang award lang ang natamo.
Ngayong Enero 8, Linggo, ay apat na pelikula ang nag-open sa local cinemas — M3GAN, Whitney Houston: I Wanna Dance with Somebody, Shotgun Wedding, at That Boy in the Dark.
Sa Enero 11, Miyerkules, ay mag-o-open ang Plane.
NOEL FERRER
Sana, kahit tapos na ang MMFF at kahit patuloy pa ring io-honor ang Season Pass hanggang Enero 13, patuloy pa ring tangkilikin ng ating mga kababayan ang mga pelikulang ipalalabas sa sinehan sa mga susunod na araw.
Bukas, January 9, ipahahayag ang rules sa gaganaping kauna-unahang Summer MMFF.
Exciting ito dahil magkakaroon ulit ng event na solely dedicated sa pagpapalabas ng pelikulang Pilipino. It will run for two weeks again simula Black Saturday!
Let’s be hopeful at patuloy na suportahan ang ganitong magagandang efforts para maibangon muli ang ating industriya ng pelikula!