JERRY OLEA:
Na-nominate ang transgender na si Iyah Mina sa 67th FAMAS bilang best actress para sa pelikulang Mamu; And A Mother, Too (2018).
Sampu silang naglaban-laban sa nasabing kategorya. Ang nagwagi ay si Nadine Lustre (Never Not Love You).
Ang walo pang nominado ay sina Judy Ann Santos (Ang Dalawang Mrs. Reyes), Gabby Padilla (Billie & Emma), Perla Bautista (Kung Paano Hinihintay Ang Dapithapon), Angelica Panganiban (Exes Baggage), Glaiza de Castro (Liway), Sarah Geronimo (Miss Granny), Marietta Subong (Oda sa Wala), at Anne Curtis (Sid & Aya: Not A Love Story).
Read: Nadine Lustre beats veteran actresses at FAMAS 2019
Sa 71st FAMAS na gaganapin sa Agosto 13, 2023, Linggo, sa Manila Hotel, isa sa limang nominadong best supporting actress ang transgender na si OJ Arci (La Traidora).
Kung hindi ako nagkakamali, si OJ ang unang transgender nominee ng FAMAS sa kategoryang iyon.
“Yes, I think ako nga po ang kauna-unahang transgender to be nominated as best supporting actress in FAMAS,” sabi ni OJ nitong Agosto 2, Miyerkules, via Messenger.
“Sobra lang pong nakakabigla na mapansin yung work ko sa La Traidora, di ko po akalain.
“I really hope that this will open more doors and opportunities to other transgender actress as well.
“May kuwento rin po kami na gustong ibahagi at walang ibang mas akmang gumanap kundi isang transgender din.
“Thank you, AQ Prime and Direk Bong Ramos. Salamat din sa aking manager, Direk Vince Tañada.”
Ang La Traidora ay isa sa apat na bagong pelikula na nag-streaming nang ilunsad ang AQ Prime noong Agosto 8, 2022.
Ang tatlo pa ay Bingwit, Adonis X, at Huling Lamay.
Nominado rin sa 71st FAMAS ang La Traidora sa mga kategoryang best picture, best director (Alejandro “Bong” Ramos), at best screenplay (Abet Raz, Alejandro Ramos).
Maliban kay OJ Arci, nasa cast ng La Traidora sina Joni McNab, Brylle Mondejar, Mia Aquino, Ricardo Cepeda, at ang walang kiyeme sa frontal nudity na si Juan Calma.
Read: Hubadero 2022 Edition: Male stars who did frontal nudity (real or prosthetics) in movies
Ang mga kalaban ni OJ Arci bilang best supporting actress sa 71st FAMAS ay sina Nikki Valdez (Family Matters), Louise de los Reyes (Deleter), Mylene Dizon (Family Matters), at Nour Hooshmand (Blue Room).
Ang mga nominadong best actress ay sina Liza Lorena (Family Matters), Nadine Lustre (Greed), Heaven Peralejo (Nanahimik Ang Gabi), Janine Gutierrez (Ngayon Kaya), at Sheila Francisco (Leonor Will Never Die).
Ang mga nominadong best actor ay sina Paulo Avelino (Ngayon Kaya), John Arcilla (Reroute), Diego Loyzaga (Greed), Ian Veneracion (Nanahimik Ang Gabi), at Noel Trinidad (Family Matters).
Ang mga nominadong best supporting actor ay sina Soliman Cruz (Blue Room), Nonie Buencamino (Family Matters), Mon Confiado (Nanahimik Ang Gabi), Sid Lucero (Reroute), at Rocky Salumbides (Leonor Will Never Die).
Take note na kasabay ng 71st FAMAS Awards sa Agosto 13, Linggo, ang 19th Cinemalaya Awards na sa PICC naman gaganapin.
NOEL FERRER:
Sayang, nami-miss ko ang grupo ni Sir Ricky Lee nang maibalik nila ang prestige ng FAMAS nang sila ang pumili noong 67th FAMAS and the year after.
Let’s see how this FAMAS group measures up.
Natuwa lang ako na medyo kahit little known films na maganda ay nagustuhan nila. Kailangan lang nilang i-check ang company in charge ng Leonor Will Never Die para ma-credit nila nang maayos.
Pero lubos ang kasiyahan ng grupo na ma-cite sila ng local award-giving body after nilang umikot sa major international festivals.
Ang mga nominadong best picture sa 71st FAMAS ay nominado rin sa kategoryang best director at best screenplay.
Ang mga ito ay Family Matters (directed by Nuel Naval, written by Mel Mendoza del Rosario), Blue Room (written and directed by Ma-an Asuncion-Dagñalan), Leonor Will Never Die (written and directed by Martika Escobar), La Traidora (directed by Alejandro Ramos, written by Abet Raz and Alejandro Ramos), at Deleter (directed by Mikhail Red, written by Nikolas Red and Mikhail Red).
Nominado rin ang Leonor Will Never Die sa mga kategoryang best production design, best editing, best cinematography, best musical score, at best sound.
Aabangan natin ang kahihinatnan ng 71st FAMAS, and may all these work for the best!
GORGY RULA:
Sayang, hindi ko napanood itong La Traidora. Kahit naka-subscribe ako sa AQ Prime, hindi ko alam na may ganun palang pelikula.
Tingnan natin kung kayang talunin ni OJ ang ibang nominado sa kategoryang ito na magagaling din. Pero mas bet ko ritong manalo si Nikki Valdez na magaling talaga sa Family Matters.
Excited nga si Mayor Enrico Roque na producer ng Family Matters na ibinalita sa aking maraming nominations ang pelikulang ito 71st sa FAMAS.
Nominado ang Family Matters sa mga kategoryang best picture, best director, best screenplay, best actress (Liza Lorena), best actor (Noel Trinidad), best supporting actress (Nikki Valdez at Mylene Dizon), best supporting actor (Nonie Buencamino), best production design, best editing, best cinematography, at best musical score.
Ligwak man sa kategoryang best sound, itong Family Matters ang pinakamaraming nominasyon sa 71st FAMAS. Ito lang ang may nominasyon sa lahat ng acting categories, at dalawa pa para sa best supporting actress.
Sana, maging patas lang ang pagpili ng mga hurado. Parang nararamdaman ko kasing susuwertehin itong La Traidora ng AQ Prime, kagaya ng Katips ni Direk Vince Tañada na humakot ng napakaraming awards nung nakaraang taon.
Read: Vince Tanada thankful for harvest of FAMAS awards for KATIPS
Sa AQ Prime nag-streaming ang 70th FAMAS umpisa Marso 24, 2023. Sa awards night noong Hulyo 30, 2022 sa Metropolitan Theater Manila ay dumagsa noon ang mga artista ng AQ Prime.