Nagsimula si Roland Sanchez bilang direktor sa pelikulang So Much Pain, So In Love (2010) kung saan tampok si Mocha Uson.
Simula noon ay marami-rami na rin ang pelikulang nagawa niya.
Pinakapaborito raw ni Roland ang EJK (2016), pinagbidahan ni Mon Confiado, at Broken Hallelujah (2014), pinagbidahan ni Kyline Alcantara, na parehong umani ng maraming international awards.
AWARD-WINNING DIRECTOR
Sabi pa niya, "Those were the first Asian films to have been invited to be exhibited doon sa Philippine Consulate sa New York.“
Pinakabago niyang nagawang pelikula nitong 2023 ang Ikigai (Life Is A Beautiful Ride) mula sa produksiyon ng Tropang Short Ride.
Lahad ng direktor, “Backdrop story niya is about agricultural smuggling and tungkol sa mga riders kasi rider kasi ako.
"We intend to submit the film sa international motorcycle film festivals kaya lang sayang naman, so ito pang-Netflix, pero sasali muna kami sa mga international film festivals.
“Kasi yung mga films ko in the past, sumasali ako sa mga European and American circuits.
"Yung Broken Hallelujah ni Kyline got eighteen international awards, yung EJK naman got twelve awards sa U.S. and sa Europe.
“Yung Broken Hallelujah garnered Best Film sa Canada, tapos nag-Best Actress dun si Eliza Pineda, yung dating child actress, saka si Rob Sy, nag-Best Actor yun back in 2017.“
Nakausap ng PEP.ph (Philippine Entertainment Portal) si Roland nitong June 12, 2023 sa Cinema 7, ng SM Mall of Asia sa Pasay City sa premiere ng Ikigai (Life Is A Beautiful Ride).
Halos lahat ng pelikulang ginawa ni Roland ay indie films, pero meron rin siyang ginawang mainstream movie tulad ng Teniente Gimo (2016) ng Viva Films with John Regala, Mon Confiado, and Julio Diaz.
Dagdag na kuwento pa niya, hindi man raw sila naging very close ni John pero ikinalungkot ni Roland ang pagpanaw ng actor.
Aniya, “2016, he was not well na already, may sakit na siya nun, e. Pero magaling talaga siyang aktor, magaling siya.”
FULL-TIME NBI AGENT
Bukod sa pagiging direktor at producer, isa ring agent ng National Bureau of Investigation si Roland.
“Iyon ang trabaho ko talaga. Itong directing, passion ko lang talaga ito, yung paggawa ng pelikula.
"Pero yung mga ginagawa kong pelikula, yung may social relevance base dun sa mga iniimbestigahan ko.”
Hindi ba natatakot si Roland na nag-e-expose ng mga anomalya sa lipunan ang ginagawa niyang pelikula?
“Hindi naman kasi, unang-una, alam ko naman yung batas, alam ko naman yung naghihiwalay sa what is fiction and what is factual.
"Pangalawa, alam ko naman yung sinasabi ko at sinusulat kasi nga NBI agent ako.”
Death threats?
“Wala naman yian, kaya nga threats lang, pero siyempre I don’t let my guard down.
"Part and parcel ng trabaho namin iyan, wala pa namang nangyayari.”
Si Roland rin ang sumusulat ng script ng mga pelikula niya, at ayon sa kanya, parehong fictional at factual ang kanyang mga pelikula.
Wala rin raw conflict sa paggawa niya ng pelikula na base sa mga kasong iniimbestigahan niya.
“Wala naman, wala namang sub judice, hindi sub judice, meaning hindi ako gumagawa ng pelikulang may nakasampang kaso sa korte, bawal yun.
“Ginagawa ko lang yung tapos na, based on the actual case na hinandle ko.”
Twenty two years na si Roland bilang isang line agent ng NBI, paano niya naisipan na tumawid sa pagdidirektor at pagsusulat ng script?
“Bata pa ako, nagkikritiko na ako ng pelikula. Nuong nagkaroon ako ng time, gumawa ako ng pelikula kasi siyempre gusto ko na yung mga vision ko as a director, as a writer, magawa ko.”
SOCIALLY-RELEVANT PROJECTS
Ayon pa kay Roland, tinatahak ng mga pelikula niya, base na rin sa karanasan niya bilang NBI agent, ang matitinding problema ng lipunan tulad ng human trafficking, drug trafficking, at ang agricultural smuggling na tema ng Ikigai (Life Is A Beautiful Ride).
Lahad niya, “Iyan ang pumapatay sa mga farmers natin sa countryside. Ang Bureau of Customs mismo ang nag-request sa amin na imbestigahan, tulungan sila.”
Bilang direktor at base sa kanyang mga vision, ano pa ang maaari niyang gawin para sa lipunan?
“Ah, number one yung mga pelikula namin transformation na lagi iyan, so meron siyang universal engagement, hindi lamang sa mga Pilipino kundi sa mga European, mga Amerikano.
"When our film about human trafficking, yung EJK was shown sa Philippine Consulate sa New York, ang daming pumuntang Amerikano doon.
"“And tuwing nag-iikot ako sa US at European circuits na ganyan, sa mga symposium, universal kasi ang tema ng human trafficking and drug trafficking.
“And this agricultural smuggling this is something new to them, maybe hindi nae-experience ng ibang bansa pero dito sa atin rampant ang smuggling ng mga agricultural products dito sa Pilipinas.”
May gagawin rin si Roland na NBI series. “Episodic iyon. Isa-submit namin sa, kausap na namin si Prime Video, sa Amazon.
“Isang pilot episode tapos ten episodes. Kaya lang kinukumpleto ko pa yung ten episodes kasi maraming kaso iyon, it will involve yung mga ten significant cases that the NBI investigated.”
Umaarte rin daw si Roland paminsan-minsan, “Ano lang, ekstra-ekstra lang sa mga pelikula ko,” ang natatawa niyang kuwento.
At sa pagkakatanda ni Roland ay nakapitong awards na siya bilang Best Director.
And to date meron siyang symposium, face-to-face iyon, tsaka university tour across USA and Europe and dito sa Pilipinas.