May espesyal na ugnayan ba sina Piolo Pascual at Shaina Magdayao?
Ito ang iniwang palaisipan ng mga litrato nina Piolo at Shaina na ilang beses namataang sweet sa isa't isa sa Bohol.
Nakatanggap ang PEP.ph (Philippine Entertainment Portal) ng kopya ng mga litrato ng dalawa na tila kuha sa bakasyon ng dalawang Kapamilya stars kamakailan.
Una na rito ang litrato kunsaan makikitang mahigpit ang yakap ni Piolo kay Shaina habang nakaupo sa pool table sa isang recreational area na ang bubong ay may disenyong nipa hut.
Kasama nila sa litrato ang aktor na si Raymart Santiago at isang di kilalang lalaki.
DOUBLE CELEBRITY COUPLE?
Sa hiwalay na litrato ay makikitang kasama rin ni Raymart ang nobyang si Jodi Sta. Maria. Matamis din ang pagkakangiti roon nina Piolo at Shaina.
Hindi malinaw kung sadyang magkakasama silang apat nang magpunta roon sa Bohol, pero malinaw na nagka-bonding sila sa resort.
May isa pa kasing litrato si Shaina na kasama si Jodi at dalawang non-showbiz na babae.
Hindi kaila na higit isang taon, o noong September 2020, unang kinumpirma ni Raymart ang relasyon nila ni Jodi sa PEP Troika.
Low-key ang dalawa at hindi gaanong nagpo-post sa social media.
PIOLO AND SHAINA'S COZY MOMENT
Ang nakatawag ng pansin ay ang isa pang hiwalay na litrato umano nina Piolo at Shaina na kuha sa isang motorboat.
Ayon sa masugid na tagasubaybay ng dalawa ay sina Piolo at Shaina ang mga ito at kuha rin daw iyon sa Bohol.
Nakahiga si Piolo sa kandungan ni Shaina, habang si Shaina ay nakahiga sa dibdib ng actor-singer.
Narito ang isa pang litrato ng dalawa na magka-holding hands sa resort.
Walang nababanggit sina Piolo at Shaina tungkol sa kung anumang espesyal na ugnayan nila ngayon.
Pero matatandaang ilang beses nang na-link ang dalawa sa isa't isa.
PIOLO AND SHAINA "DATING" FOR MANY YEARS
Sa panayam ng PEP.ph (Philippine Entertainment Portal) noong February 2017, sinabi ni Piolo na "five years" na silang "exclusively dating" ni Shaina.
Pero pinakalma noon ni Shaina ang fans na kinilig sa rebelasyon ni Piolo tungkol sa pagiging malapit nila sa isa't isa.
Inamin ni Shaina na "very present" sa buhay niya si Piolo, at totoong madalas silang nagkikita.
Pero diin ni Shaina, noong panahong iyon ay wala silang commitment sa isa't isa.