Mariing pinabulaanan ni Ogie Diaz ang kontrobersiyal na pahayag ng CEO ng Careless Music na si Jeffrey Oh patungkol sa imbitasyon umano ng Marvel kay Liza Soberano na mag-audition para sa Spider-Man: Homecoming noong 2016.
Ang Careless Music, isang record label at talent management company, ang namamahala ngayon sa career ni Liza.
Noong March 7, 2023, sinabi ni Jeffrey sa isang presscon na hindi umano natuloy ang audition ni Liza para sa Spider-Man: Homecoming dahil sa pagkakatali ng aktres sa kontrata nito sa dati niyang management na Star Magic, ang talent management arm ng ABS-CBN.
Ayon kay Jeffrey, inimbitahan ng Marvel si Liza noon upang mag-audition para sa role na Mary Jane, ang role na nakuha ng Hollywood actress na si Zendaya.
Pahayag niya: "Liza was offered to audition for that role, they reached out for her to audition to be Mary Jane, one of the most iconic characters.
"She was not allowed because she had to do the same thing she was always doing, right?
"I really shouldn't have said that. But it's the truth, it's the truth.
"Now, imagine this wasn't like as if she was being marketed, like they reached out.
"That was I mean by, like, it's self-evident in a lot of different ways when you go out, there are people looking for Filipino talent."
Read: The times Liza Soberano's quotes made headlines
Sabi pa ni Jeffrey, kung natuloy lang sana si Liza na gampanan ang karakter na Mary Jane ay paniguradong malaking tulong ito sa Philippine entertainment industry.
"Imagine, a Filipina actress was a star of one of the biggest Marvel history, movies in history?
"Imagine she was Mary Jane? What that would do for Philippine entertainment?
"But then, she was in a 10-year contract which is also unheard of anywhere else in the world?"
Read: Careless CEO claims Liza Soberano offered to audition for Zendaya's role in Spider-Man
OGIE DIAZ REACTS
Sa vlog sa YouTube ni Ogie, kasama sina Mama Loi at Ate Mrena, nitong Huwebes, March 9, 2023, sinopla niya ang naging pahayag ni Jeffrey.
Ayon kay Ogie, hindi niya kayang ipagwalang-bahala ang isyung ito dahil baka isipin ng iba na may katotohanan ang mga sinabi ng Careless CEO.
Si Ogie, katuwang ang Star Magic, ang namamahala noon sa career ni Liza.
Sabi ng talent manager/comedian sa vlog, "Isisingit ko lamang po itong issue na ito ha, baka kasi pag dinedma ko ito, baka ang feeling nila, e, totoong nangyari ito.
“Ito'y may kinalaman po doon sa sinabi ni Mr. Jeffrey Oh, ang CEO ng Careless Management ni Liza Soberano, tungkol doon sa nanghihinayang sila kung bakit sana ay si Liza Soberano ang gumanap na Mary Jane, na leading lady ni Spider-Man noong mga 2016 o 2017.
“Si Liza Soberano rin po ang nagsabi niyan na walang imbitasyon na galing sa Marvel.
“At iyong tweet na iyon ay galing sa isang fan na nagpakalat na naniniwala na posible na makapasok si Liza bilang isa sa mga extra or mayroong mga roles doon sa Spider-Man kung siya ay sakaling mag-a-audition.”
Ang tinutukoy ni Ogie ay ang naging pahayag ni Liza noong 2016, nang pabulaanan niya ang haka-hakang naimbitahan siyang mag-audition sa Spider-Man: Homecoming bilang Mary Jane.
Read: Liza Soberano clarifies rumors about her inclusion in next Spider-Man movie
Hindi raw alam ni Ogie kung ano ang pinanggagalingan ng pahayag ni Jeffrey.
Hinamon din niya itong ilabas ang ebidensiya o resibong magpapatunay na may imbitasyon ngang natanggap si Liza mula sa Marvel.
Saad ni Ogie, “Hindi ko alam kung dito nanggagaling si Mr. Jeffrey Oh, doon sa tweet ng fan na iyon o baka naman meron siyang resibo.
“Mr. Jeffrey, you might want to release the receipt or the proof, that Liza received an invitation from Marvel to audition for the role of Mary Jane?
“Dahil ako, bilang former manager ni Liza, ang Star Magic at ng ABS-CBN, as far as we know, walang imbitasyon mula sa Marvel.
“At yan ang sinegundahan ni Liza. Kaya hindi ko alam kung saan nanggagaling si Mr. Jeffrey.
“E, kaya nga hinihingan ko ng resibo kasi baka kapag may resibo, e, makapag-sorry kami kay Liza.”
OPPORTUNITY FOR LIZA
Pinabulaanan din ni Ogie ang sinabi ni Jeffrey na hindi pinayagan si Liza na mag-audition dahil sa kontrata niya sa kanyang home network.
Aniya, kung mayroon talagang imbitasyon ay hindi nila ito palalampasin lalo na’t pangarap daw ni Liza na gumanap sa isang Hollywood movie.
“Sino ba naman ang ayaw? Lead yun ano, at Hollywood movie yun ano, na pangarap ni Liza.
“Pero wala nga pong imbitasyon. Alangan namang mag-gatecrash ka sa audition, wala namang ganun.
“Tapos bakit naman hindi namin ia-allow yung bata, di ba? Although that time, marami talagang ginagawa si Liza.
“E, kasi may pangalan na noon si Liza, popular na si Liza noon.
“Alangan naman na nakatanghod lang yon sa bahay at naghihintay lang siya kung mayroon siyang audition mula sa Hollywood, hindi ba?”
LIZA GETTING BASHED
Ilang araw nang pinuputakti ng bashers si Liza magmula nang ilabas niya ang "this is me" vlog sa YouTube na naglalaman ng mga detalye patungkol sa kanyang showbiz career.
Read: Liza Soberano opens up about people getting “disappointed” with decision to change management
Read: Boy Abunda disappointed with Liza Soberano's "this is me" vlog
Ani Ogie, maging siya ay nalulungkot at nanghihiyang sa sinapit ni Liza matapos ang matagumpay niyang showbiz career sa ilalim ng pangangalaga nila dati rito.
Saad niya, “Kaya nga sabi ko, sana nag-uusap sina Liza at yung bago niyang management, or kinausap muna ni Mr. Jeffrey Oh si Liza, kung anong pakakawalan na statement.
“Kasi dahil sa statement na yan, binash tuloy nang binash si Liza. Pinagmumukhang ilusyunada si Liza.
“Dyusko naman, hindi naman starlet si Liza.
“Sikat pa rin naman si Liza, kaya bakit kailangan dumaan sa mga ganitong ka-cheap-an si Liza, hindi ba?
“Hindi natin alam baka strategy ito ng Careless na lumikha ng ingay. If that is the case, aba, bongga, they did it!”
Read: Liza Soberano reveals Hello, Love, Goodbye was first offered to LizQuen; Kathryn Bernardo fans react
Sa huli, matapang na sinabi ni Ogie na huwag na huwag kuwestiyunin ng bagong management ni Liza ang pagma-manage nila sa aktres sa loob ng maraming taon.
Aniya, “Dyusko naman, Mr. Jeffrey, kinukuwestiyon mo yung ten years naming pagma-manage kay Liza.
"Mas nakakahiya naman siguro kung sa loob ng ten years na yun, e, wala namang nangyari kay Liza. Hindi naman siya sumikat. Hindi naman siya nakilala, hindi siya naging successful.
“After all, hindi niyo rin naman kukunin si Liza kung hindi rin naman siya sikat. Kung nanatili siyang starlet sa loob ng sampung taon, hindi ba?”
Diin pa ni Ogie: “You cannot erase the fact that ABS-CBN, Star Magic, and Ogie Diaz were part of Liza Soberano's success and popularity [that] you are enjoying."