"National Dabarkads Day" at hindi 44th anniversary ng noontime program na dati nilang kinabibilangan ang ipinagdiwang nina Tito Sotto, Vic Sotto, Joey de Leon, at ng Dabarkads sa E.A.T., ang kanilang television show sa TV5, ngayong Sabado, July 29, 2023.
Ang ika-44 taon naman ng Eat Bulaga! ang sentro ng pagdiriwang nina Paolo Contis, Isko Moreno, at ng mga co-host nila sa live telecast ng kontrobersyal na programa na napapanood sa GMA-7.
Kulay pula na T-shirts na may tatak ng mga numero ng mga taon ng pagiging Dabarkads nila ang suot ng TVJ (44 years) at ng ibang mga miyembro ng E.A.T. na nagsimula ang TV hosting career sa Eat Bulaga!.
“Saan man kami dalhin ng tadhana, ipagdiriwang namin ang araw na naging mag-Dabarkads tayo.
"Dahil higit sa programa, selebrasyon ng ating pagkakaibigan na pinatibay ng mga pagsubok, pinasarap ng panahon, at pinalalim ng pagmamahalan,” deklarasyon ni Vic tungkol sa National Dabarkads Day, na kanilang ipinagdiriwang sa bisperas ng tunay na anibersaryo ng Eat Bulaga! na nag-umpisang mapanood sa RPN-9 noong July 30, 1979.
Kung hindi umalis sa TAPE Inc. ang TVJ, ang 44th anniversary sa telebisyon ng Eat Bulaga! ang ginugunita nila. Pero paulit-ulit na sinambit ng Dabarkads ang mga numerong "14344" na pagpapaalala sa lahat na sila ang orihinal na hosts ng programa.
“Saan ka mang panig ng mundo, kasama ka sa National Dabarkads Day celebration,” reaksiyon ni Joey.
Samantalang, “Para ito sa legit na samahan natin for forty-four years and beyond,” ang sabi ni Tito.
Samantala, hindi napigilan ni Paolo Contis na maging madamdamin nang magsalita siya tungkol sa sariling selebrasyon nila sa 44th anniversary ng Eat Bulaga!.
“July 29, mahalaga po ang araw na ’to sa Eat Bulaga!. Forty-four years ago, sinimulan po ng Eat Bulaga! ang pagbibigay ng saya.
“Lumipas man po ang panahon sa kahit anong pagkakataon, maiba man po ang mga artistang humaharap sa inyo araw-araw, ang hindi po mababago ay ang hangarin ng Eat Bulaga! na magbigay ng saya at magbahagi ng pag-asa.
"Tulong at saya, yan po ang aming bagong tugon sa panahong ito,” ang pahayag ni Paolo na muntik nang mapaluha.
Ipinaalaala naman ni Isko Moreno sa manonood ng Eat Bulaga! ang pangako na binitiwan nila nang magsimula sila bilang mga host ng programa.
“In our own little way, ngayong anibersaryo ng Eat Bulaga!, ang selebrasyon na ito ay alay namin sa inyo para mapangiti lang kayo kahit papaano.
“Mga Kapuso, noong nagsisimula kami bilang bagong hosts, ang ipinangako namin sa inyo ay kayo ang laging dahilan kung bakit kami naririto. Sabi nga namin, it’s not always about the hosts, it’s always about the viewers.”