Tiyak na ang pagbabalik ni Willie Revillame sa telebisyon.
Mapapanood na sa TV5 ang Wowowin, ang dating game show at public service program niya sa GMA-7 at ALLTV.
Read: The many times Willie Revillame says goodbye to his own TV shows
Siguradong pag-uusapan ang nalalapit na pagbabalik ni Willie sa Kapatid Network, na naging tahanan niya mula 2010 hanggang 2013 dahil sa Willing Willie, WillTime Bigtime, at Wowowillie.
Mabilis na kumalat ang balita tungkol sa pagbabalik-telebisyon at pagiging Kapatid muli ni Willie dahil sa larawang inilabas ni Atty. Enrique “Buko” dela Cruz, isa sa mga legal counsel ng Wowowin host, ngayong Biyernes ng gabi, Marso 15, 2024.
Kasama ni Willie sa litrato sina Atty. dela Cruz at ang TV executives na sina Mediaquest at CignalTV president Jane Basas, TV5 president Guido Zaballero, at Mediaquest chief finance officer John Andal.
Kuha ang litratong may caption na “Wowowee sa TV5???” sa opisina ng Cignal TV.
Naka-post din sa official Facebook page ng Wowowin ang larawan ng lima na may caption namang “Breaking News! Mga Big Boss ng TV5 at si Kuya Wil, nagkita!"
Base sa impormasyong nakarating sa Cabinet Files, Wowowin pa rin ang pamagat ng show ni Willie sa TV5.
Diumano, mapapanood ito pagkatapos ng Eat Bulaga!, ang noontime variety show nina Tito Sotto, Vic Sotto, at Joey de Leon.
Dating natutunghayan sa GMA-7 ang TVJ, pero lumipat sa Kapatid Network ang veteran TV hosts noong July 1, 2023.
Read: Eat Bulaga! returns to TVJ: "Isa lang ang puwedeng tawaging Eat Bulaga!."
Ang back-to-back na pagtatanghal ng Eat Bulaga! at Wowowin ang isa sa mga dapat abangan ng manonood.
Ayon nga sa isang insider: “May Eat Bulaga! na, may Wowowin pa!”
Tiyak na lalo itong magpapasigla sa hapon ng televiewers na matagal nang hinihiling kay Willie na bumalik na ito sa telebisyon.
Hindi pa naglalabas ng opisyal na anunsiyo ang TV5 tungkol sa petsa ng pagsisimula ng Wowowin, pero may mga espekulasyong mangyayari ito sa Abril 2024.
Malapit na kasing matapos ang studio na ipinagagawa ni Willie sa Sta. Lucia East Mall, Cainta, Rizal.