Kinabog ng Miracle In Cell No. 7 ang The Mall, The Merrier nina Vice Ganda at Anne Curtis sa takilya ng Metro Manila Film Festival (MMFF) 2019.
Read: Miracle In Cell No. 7, kumpirmadong naungusan na ang The Mall, The Merrier sa box office
Sa MMFF 2022, kasabayan naman ng Family Matters ang Partners In Crime nina Vice Ganda at Ivana Alawi.
Si Nuel Naval ang parehong direktor ng Miracle In Cell No. 7 at Family Matters.
Nag-trending at pinag-usapan nang lubos ang trailer ng Family Matters. Mas may pressure ba ngayon ang pakikipagsalpukan sa pelikula ni Vice?
Read: Trailer ng MMFF 2022 entry na Family Matters, umabot na sa 5M views
“Well, sa akin, ang pressure siguro because we’re coming from a pandemic, so parang ngayon pa lang uli magbabalik ang mga tao sa sinehan. So, mas doon ko siya tinitingnan," sagot ni Direk Nuel sa mediacon noong Disyembre 7, 2022, Miyerkules sa La Breza, Mother Ignacia Avenue, Quezon City.
“When it comes to competition naman, sa akin, siguro yung success… I would define it kung magiging successful yung film namin is… to be able to reach out to the audience.
“Yung masasabi namin ang mensahe ng pelikula. For me, yun yung pinakamalaking success nito — kung manonood ang mga tao, mga pami-pamilya.
“And then after watching, biglang gusto nilang yakapin ang nanay nila, ang tatay nila. Mas doon ko tinitingnan yung magiging impact.
“Yung pagkatapos mong panoorin… kung magkahiwalay kayo ng nanay o tatay mo, gusto mo siyang tawagan. Gusto mong kumustahin, ‘Kumusta ka, Nanay?’ ‘Kumusta po, Tatay? Mahal kita.’
“Tapos yung kapatid mo na medyo nagkalayo kayo, yung gusto mong yakapin uli. Yung mabuo uli yung pamilya, especially, di ba, two years tayong hindi nagkita-kita, e.
“Andaming pamilya na hindi nagkita-kita, yung two years because of the pandemic, di ba?
"So, parang ang ganda na, this time, after mo mapanood yung pelikula, maiisip mo na, ‘Sobra ko palang nami-miss ang nanay ko.’ ‘Sobra kong nami-miss ang pamilya ko.’”
FAMILY MATTERS CAST
Ang Family Matters ay istorya ng mag-asawang senior citizen na sina Francisco (Noel Trinidad) at Eleanor (Liza Lorena), at ng kanilang apat na mga anak na sina Kiko (Nonie Buencamino), Fortune (Mylene Dizon), Ellen (Nikki Valdez), at Enrico (JC Santos).
Ang iba pang mga karakter ay ginampanan nina Agot Isidro, James Blanco, Anna Luna, Ina Feleo, Ketchup Eusebio, Roxanne Guinoo, at Ian Pangilinan.
Paano nabuo ang casting na ito, partikular ang pagkuha sa 81-anyos na si Noel Trinidad bilang lead actor?
Pahayag ni Direk Nuel, “Actually, nung nakuha namin yung script, tapos sabi ko lang sa producer namin, ‘Can I have a free hand to choose yung actors?’
“Sabi ko kasi, ensemble nga ang movie na ito, walang single character na aangat. Kailangan sila, sabay-sabay, except of course for the two leads.
“So, ambait nung producer, sabi niya, ‘Sige, sino ang mga gusto mo diyan?’ So, of course yung cast, you have to give options, di ba? Kasi baka hindi available sa schedule. But all of them, nasa choice ko personally.
“And then we always go back to Tito Noel because there was one time na hindi siya puwede. Tapos sabi ko, ‘Tito Noel, iintayin kita. Hindi puwedeng hindi ikaw. Because ikaw lang talaga ang nakikita ko sa role na ito.’
“And yun na nga, para sa akin kasi, it’s an honor na, di ba, bihira na for seniors to get lead roles? So, napakaimportante sa akin na sila… sila yung maging lead.”
Ang nag-produce ng Family Matters ay si Pandi, Bulacan Mayor Enrico Roque.
Dagdag ng scriptwriter na si Mel Mendoza-del Rosario, “Ako talaga, yung sa mga anak, sabi ko kay Nuel, ‘Ikaw na ang bahala, kasi kung maging peste sila sa set, ikaw naman ang mamomroblema.’ Di ba?
“Kasi ang hirap ng ensemble, tapos may isang… di ba, yung kunsumisyon? Ang hirap! But yung si Tito Noel, talagang sabi ko, ‘Sana, si Tito Noel kasi he has that vulnerability and strength,’ yung ganun.
“Vulnerable and at the same time strong, fierce father din. Wala akong ma-imagine other than him.
“Ay! Can I also say, I’d like to acknowledge din si Fr. Robles who wrote Sa Aking Pagtanda na poem. He was very gracious and lend us his poem.”
MEL DEL ROSARIO'S INSPIRATION
Na-inspire ang scriptwriter na si Mel sa sariling karanasan kaya nasimulan niya ang kuwento ng pelikulang Family Matters.
“There was a time na I really lessened my work load,” pagtatapat ni Mel.
“Kasi I felt my parents were growing old and I really took time to take care of them. And during the time, parang na-inspire ako… dun ko talaga naramdaman yung nare-reverse ang role.
“The children take care of the parents, na parang naging alagain. So that was the take off. But I had the script, mga 2018-19 pa.
“I wrote it and then I set it aside. Sabi ko, ‘Hindi ko ise-sell until sure na ipo-produce.’ So it was really waiting for the right time also.”
Sinasalamin ba ng Family Matters ang kanyang totoong buhay, ang kanyang pamilya?
Paliwanag ni Mel, “Ahhm, siguro yung age din ng mga barkada ko, ito yung when you get together, pinag-uusapan, ‘Di ba, ang hirap ng parents natin,’ ganito-ganito.
“So, ito ay halu-halo na ng mga experiences ko saka mga kilala ko in terms of dynamics sa pag-alaga ng magulang.”
FAMILY MOVIE IN TIME OF PANDEMIC
Paano naiatang kay Nuel ang pagdidirek ng Family Matters?
Pagsisiwalat ni Direk Nuel, “Well, actually, matagal na akong kinukuha ng Cineko to do a movie for them. Tapos tiyempo ito after the pandemic, ahh naalala ko yung script na pinabasa sa akin ni Mel.
“Sabi ko, ‘Ay! Parang this is the perfect time for this movie.’ Kasi katatapos nga lang ng pandemic, tapos parang kailangan natin ng ganitong klaseng pelikula.
“So, naalala ko yung script, binigay ko kay Mayor Roque ang script. And immediately, nagustuhan niya ang script.
“Walang pina-revise. Walang anything na pinagalaw dun script. So, I think this is the perfect time for it.”
Intended ba talaga ang pelikula para sa Metro Manila Film Festival (MMFF)?
Tugon ni Direk Nuel, “Well, nung una ko kasi siyang nabasa, gusto ko sana talagang maging follow-up sa Miracle in Cell No. 7. Kasi, family movie, di ba?
“Yung Miracle in Cell No. 7, di ba, father and daughter. Dito sa Family Matters, gusto ko, buong pamilya naman. Kaya lang nagka-pandemic, hindi natuloy, di ba? So, na-hold yung project.
“Hanggang sa eto, eto na yung tingin ko, tamang-tamang panahon para rito.”
TANGING YAMAN
Base sa trailer ng Family Matters, naikukumpara ito sa MMFF 2000 entry na Tanging Yaman.
Ang nasabing pelikula na pinagbidahan ni Gloria Romero ay humakot ng awards at pinilahan sa takilya.
Idinirek iyon ni Laurice Guillen, at nagtampok din kina Johnny Delgado, Edu Manzano, Dina Bonnevie, Hilda Koronel, Joel Torre, Cherry Pie Picache, Marvin Agustin, Jericho Rosales, CJ Ramos, Shaina Magdayao, John Prats, Carol Banawa, Dominic Ochoa, at Janet McBride.
Pagmamatuwid ni Mel, sa Tanging Yaman ay pinag-awayan ng magkakapatid ang mana, at nagka-Alzheimer’s ang karakter ni Gloria.
“I’d like to think our movie is more intimate. Ang problema namin ay hindi… kasi, ilang pamilya lang naman ang nag-aaway-away sa yaman,” lahad ni Mel.
“Ang problema ng pamilya rito ay problema na pang-araw-araw. Very relatable and very common. Very Pinoy.”
Sobrang naka-relate si Direk Nuel sa istorya ng Family Matters. Salaysay ni Direk Nuel, “There was a time, my mother, nagkakanser. So I had to give up all the work I have. So, nagagalit sa akin sina MNS kasi bigla akong nawala. That’s for two months.
“Tinanggal ko lahat ng trabaho. Hindi ako nagtrabaho at all, tapos nag-alaga lang ako sa nanay ko na nasa hospital.
“So, parang feeling ko kasi, that’s my way of giving back to them nung inalagaan nila ako nung bata.”