Sina Nadine Lustre, Noel Trinidad, Sid Lucero, at Nikki Valdez ang top winners sa gabi ng parangal ng 71st FAMAS na ginanap nitong Linggo ng gabi, August 13, 2023, sa Manila Hotel, Manila.
Best actress winner si Nadine para sa Greed ng Viva Films.
Inialay ni Nadine ang tagumpay nito sa kanyang pamilya, boyfriend na si Christophe Bariou, mga kaibigan, at sa home studio niya, ang Viva Films.
Nagpasalamat din si Nadine sa Greed director na si Yam Laranas sa pagtitiwala sa kanyang kakayahan bilang aktres.
Si Noel ang best actor para sa kanyang pagganap sa Family Matters ng CineKo Productions.
Read: Family Matters very relatable; cast delivers solid performance
Napahaba ang acceptance speech ni Noel kaya pinatunog ang bell. Tinapos ng beteranong aktor ang pagsasalita, pero muli siyang bumalik para pasalamatan ang kanyang asawa na si Laly Laurel, na nalimutan niyang banggitin.
Best supporting actor ang Reroute star na si Sid, at nanalo si Nikki na best supporting actress dahil sa role niya sa Family Matters.
Best Picture ang Family Matters at best director si Ma-an L. Asuncion-Dagñalan para sa Blue Room.
FAMAS 2023 COMPETE LIST OF WINNERS
Best Actress: Nadine Lustre
Best Actor: Noel Trinidad
Best Supporting Actress: Nikki Valdez
Best Supporting Actor: Sid Lucero
Best Sound: Reroute
Best Musical Score: Blue Room
Best Editing: Family Matters
Best Production Design: Leonor Will Never Die
Best Cinematographer: Neil Daza para sa Blue Room
Best Screenplay: La Traidora.
Special Awards
Ang Most Outstanding Public Service Award ay iginawad kay Quezon City District V House Representative PM Vargas, na kapatid ng aktor na si Alfred Vargas
Read: Brothers Alfred, PM Vargas reminisce "sobrang wala" days
Ang nakakuha ng FAMAS Exemplary Award on Public Service ay si House Speaker Martin Romualdez, na hindi dumalo kaya ang kinatawan niya ang tumanggap ng parangal.
Si Senator Lito Lapid ang pinagkalooban ng FPJ Memorial Award, habang si Jun Urbano ang binigyan ng Dr. Jose R. Perez Memorial Award.
Ang veteran actress na si Marita Zobel ang tumanggap ng FAMAS Lifetime Achievement Award.
At hindi man nanalo si Liza Lorena sa best actress category, siya naman ang ginawaran ng Susan Roces Celebrity Award.
Ilan sa mga artistang dumalo ay nabigyan din ng award.
Male Face of the Night si Mon Confiado, na hindi makapaniwala sa parangal na ipinagkaloob sa kanya kaya ang nasambit niya, "Nagulat ako dun!"
Female Face of the Night winner si Nadine.
Hindi nag-iisa si Mon na nagulat nang tawagin ang pangalan, maging si Sid Lucero rin na nanalo as Male Star of the Night.
Female Star of the Night si Jillian Ward, na recipient ng German Moreno Youth Achievement Award.
Nag-level up na ang pamimigay ng mga Star of the Night at Face of the Night awards dahil this time around, may pa-sash na ang mga sponsors para sa mga nagwagi.
Congratulations sa lahat ng winners!