Magkasabay na dumating sina Direk Nuel Naval at Mel Mendoza-del Rosario sa Metro Manila Film Festival (MMFF) 2022 Gabi ng Parangal nitong Disyembre 27, Martes, sa New Frontier Theater, Cubao, Quezon City.
Sina Nuel at Mel ang direktor at scriptwriter, respectively, ng pelikulang Family Matters.
Nainterbyu sila ng ilang media people sa bukana ng New Frontier Theatre bago mag-umpisa ang awarding ceremony.
Aminado sina Direk Nuel at Mel na nasorpresa sila sa lakas ng Family Matters sa takilya on its first two days.
Katuwiran ni Mel, “Wala kaming superstars. We have very competent actors and actresses pero wala kaming big name. So ahhh… we’re happy and we’re pleasantly surprised.”
Sambot ni Direk Nuel, “Alam naming story ang magdadala sa amin. Sobrang na-surprise kami. Kasi nga, wala kaming superstar.
“Sana ngayon, ito na ang mag-give way doon sa mga character actors natin na magagaling na magkaroon ng mga lead roles at magkaroon ng magagandang projects.
“Kasi for me, it’s about time. Like si Dolly de Leon, di ba, nabigyan ng chance. Iyon ang isa sa mga gusto kong mangyari dito kaya ipinaglaban ko rin ang mga artista namin, kahit alam naming walang superstar.”
Kabilang sa cast ng Family Matters sina Noel Trinidad, Liza Lorena, Nonie Buencamino, Agot Isidro, Mylene Dizon, James Blanco, Nikki Valdez, JC Santos, Anna Luna, Ina Feleo, Ketchup Eusebio, Roxanne Guinoo, at Ian Pangilinan.
EXPECTations
Nag-e-expect ba ng maraming awards ang Family Matters?
Mabilis na tugon ni Direk Nuel, “Ako personally, hindi ako nag-e-expect. Kasi ano, marami namang magagandang pelikula. Saka sa akin, enough na yung magaganda yung reviews.
“So, yung tao na ang nagsabi na maganda ang pelikula namin. I think that’s more than enough. Bonus na lang kung manalo.
“Of course, we’re hoping. Pero yung successful, sabi namin, sana… kasi, may message kaming gustong sabihin sa pelikula. So, the more na maraming makapanood, mas maraming mata-touch.”
Bulung-bulungan na nakaka-surprise ang ilang nominadong artista sa MMFF 2022 Gabi ng Parangal. Masu-surprise siguro sila…
“Ganun ba? Naku, hindi ko alam, hindi ko masabi. Kasi, hindi ko pa napanood lahat, e,” sambit ni Direk Nuel.
Masaya silang pinupuri ng maraming nakapanood sa Family Matters ang pelikula at mga artista rito, kaya lang, posibleng iba ang panlasa ng mga hurado.
Napatango si Direk Nuel, “Yes, of course. Kasi parang… yun nga, sabi ko kanina, di ba? Ahhh… yung mga nanood, yung mga nag-review, yung mga pumuri sa amin, marami sila, e.
“So, ang judges kasi… kumbaga, ganun naman, e. It’s a contest, e. Ang judges, ilan lang naman sila. Of course opinion nila yun.
“Sa akin, enough na maraming naka-appreciate.”
THE CAST DESERVES NOMINATIONS
Deserving ba si Liza Lorena na ma-nominate?
“Sa akin, yes of course. Kasi ano, e, ang natural… yun ang gusto ko dun sa ensemble ng actors namin,” pagmamatuwid ni Direk Nuel.
“Walang umakting, walang nag-overact. Lahat natural ang binigay. So for me, a good acting is no acting. Di ba? So yun.”
Sina Agot Isidro at Mylene Dizon, deserving bang ma-nominate na best supporting actress?
“Kahit sino naman, deserving, e. I think, ha?! Kasi, yun na nga ang sinasabi ko, hindi sila umarte sa pelikula,” sabi pa ni Direk Nuel.
“Parang ang nakita mo, yung karakter na pinortray nila. Parang… all these actors, they lost themselves into the character. For me, that’s important.”
Paano kung hindi sila ma-nominate?
Natigilan sandali si Direk Nuel, “Well, sa akin… kamukha nung sa film, kung hindi kami ma-nominate, OK lang.
“Kasi, importante nga na maraming pumuri sa kanila, e. Maraming nagsasabi na ang galing nila as ensemble acting.
“So, more than enough. Siguro, marami pa namang awards night, di ba? Puwede pa silang… hindi lang naman ito yun. Saka bonus na lang yun.
“That’s an honest ano, ha? No bitterness or anything kung hindi kami ma-nominate or ano.”
REALITY
Nagkamit ang Family Matters ng Gatpuno Antonio J. Villegas Cultural Award sa MMFF 2022 pero ni hindi ito nakasama sa limang nominadong best picture.
Nakakuha ito ng nominasyon ay sa mga kategoryang best actor (Noel Trinidad), best supporting actor (Nonie Buencamino), best original theme song, at gender-sensitivity award, kung saan nganga ito.
Magkasabay na umalis sina Direk Nuel at Mel bago pa ihayag ang limang nominadong best director.